Sunnudaginn 20. nóvember stóð foreldrafélag Bláskógaskóla fyrir jólaföndurs degi. Í boði var að skreyta piparkökuhús sem beið tilbúið og uppsett, föndra og búa til músastiga úr krempappír. Foreldrar mættu með eitthvað á hlaðborð og jólatónlist ómaði um húsið og svo var skiptimarkaður með fötum og leikföngum 🙂 Dagurin var vel heppnaður og virkilega gaman hve margir gátu mætt og tekið þátt í gleðinni. Hér eru nokkrar myndir frá deginum 🙂
Vikuna 7. – 11. nóvember var þemavika hér í Bláskógaskóla á Laugarvatni. Mikill metnaður og áhugi var hjá nemendum og starfsfólki og leyndi það sér ekki í hverjum hóp fyrir sig þar sem allir gátu fengið að sinna því sem þau höfðu helstan áhuga á. Þemu ársins voru valin af nemendum og í boði var að fara í boltaíþróttir, tækni og vísindi, útivist, dans söng- og leiklist, matreiðslu, myndlist og föndur. Nemendur grunnskólans gátu valið um tvö þemu sem þau sóttu alla vikuna og endaði vikan með fjölbreyttri og skemmtilegri uppskeruhátíð á föstudeginum þar sem ættingjar og vinir gátu notið veitinga, skoðað myndlist, horft á sýningu og prófað sig áfram í allskyns þrautum svo eitthvað sé nefnt.
Á föstudeginum sendu svo nemendur skólans um 50 fulla skókassa (jólapakka) frá sér til barna í Úkraínu. Jól í skókassa er alþjóðlegt verkefni sem felst í því að fá börn jafnt sem fullorðna til þessa að gleðja önnur börn sem lifa við fátækt, sjúkdóma og erfiðleika með því að gefa þeim jólagjafir. Öll börn skólans tóku þátt og myndaðist hlý og skemmtileg stemning við þetta verkefni.
Þann 31. október var síðasti vinnudagurinn hennar Auðar hér í Bláskógaskóla. Auður hefur unnið í eldhúsi skólans s.l. 8 ár og var þar áður í nokkur ár í leikskólanum. Um leið og við þökkum Auði kærlega fyrir gott samstarf og hlýjar móttökur í mötuneytinu síðustu ár, óskum við henni alls góðs í framtíðinni og bjóðum við hana Heiðu Björgu Hreinsdóttur í Hólum velkomna í eldhúsið.
